ვენდორის წესები
შეზღუდვები
- ვენდორად დარეგისტრირება შეუძლია იურიდიულ პირს (შპს), ინდივიდუალურ მეწარმეს და სრულწლოვან ფიზიკურ პირს.
- ვენდორის სტატუსში რეგისტრაციამდე ყურადღებით გაეცანით მარკეტის "წესებსა და პირობებს" და "ვენდორის პაკეტებს".
- ვენდორის საქმიანობის ძირითად ან ერთ-ერთ ლოკაციას უნდა წარმოადგენდეს ქალაქი თბილისი.
- ვენდორის მყიდველთან კომუნიკაცია ხორციელდება მხოლოდ მარკეტის შიდა ჩატის საშუალებით. დაუშვებელია: კომუნიკაციის მარკეტის ფარგლებს გარეთ გადატანა, მიწოდების საკუთარი მეთოდების შეთავაზება, მყიდველის საკონტაქტო მონაცემების გამოყენება სარეკლამო ან სხვა სახის შეთავაზებებისთვის.
მოვალეობები
- ვენდორი ვალდებულია ყურადღებით აკონტროლოს მარკეტში განთავსებული პროდუქციის მარაგები. შემთხვევის დაფიქსირებისას, როდესაც ვენდორმა ვერ გააკონტროლა საქონლის მარაგი და ხელთ არ აქვს მყიდველისთვის გადასაცემი პროდუქტი, ვენდორს დაეკისრება პირგასამტეხლო, რომელიც განისაზღვრება პროდუქტის სრული ღირებულების 2%-ით.
- ვენდორი ვალდებულია შეკვეთილი პროდუქტი მარკეტის საკურიერო სამსახურს დაახვედროს შეკვეთის დაფიქსირებიდან არაუგვიანეს 1 სამუშაო დღის განმავლობაში. ნივთი უნდა იყოს შესაბამისად შეფუთული და ტრანსპორტირებისთვის მზად. თევზების, უხერხემლოების, მცენარეების, ცოცხალი და გაყინული საკვების ტრანსპორტირება ხდება მარკეტის საკურიერო სამსახურის სპეცკონტეინერების გამოყენებით. კურიერი წინასწარ გითანხმებთ ვიზიტის დროს. თევზების ან უხერხემლოების რეალიზაციის შემთხვევაში, გთხოვთ კურიერს თევზები დაახვედროთ მცირე ზომის ჭურჭელში, რომ დაუყოვნებლივ მოხდეს მათი გადაყვანა სატრანსპორტო სპეცკონტეინერში.
მიწოდება
- მარკეტში შეძენილი პროდუქციის მიწოდების ერთადერთი მეთოდია მარკეტის ფულფილმენტი: მარკეტის საკურიერო სამსახური იღებს ნივთს ვენდორისგან და უზრუნველყოფს მის მიწოდებას მყიდველისთვის.
- მარკეტის საკურიერო სამსახური იღებს თქვენგან ნივთს თბილისის ტერიტორიაზე და აწვდის მას დამკვეთს საქართველოს მასშტაბით. გამონაკლისს წარმოადგენს შემდეგი კატეგორიების პროდუქცია, რომლის მიწოდება ხორციელდება მხოლოდ თბილისის მასშტაბით (ცალკე ლოკაციებად გამოყოფილი თბილისის გარეუბნების გარდა): აკვარიუმები, თევზები, უხერხემლოები, მცენარეები, ცოცხალი და გაყინული საკვები.
ფინანსები
- განთავსებული პროდუქციის ფასი მოიცავს მარკეტის მოსაკრებელს, რომლის სიდიდე დამოკიდებულია არჩეულ ვენდორ-პაკეტზე. შემდეგი კატეგორიების პროდუქციას ემატება 5%-იანი ფასნამატი ვენდორ-პაკეტში მითითებულ მარკეტის მოსაკრებელზე: აკვარიუმები, თევზები, უხერხემლოები, მცენარეები, ცოცხალი და გაყინული საკვები, მეორადი ნივთები.
- მარკეტი ვენდორთან ანგარიშსწორებას ახდენს მხოლოდ შემდეგი მეთოდით: თანხის საბანკო ანგარიშზე ჩარიცხვით.
- საქართველოს კანონმდებლობის მიხედვით, ონლაინ-შესყიდვისას მომხმარებელს ქვს უფლება 14 კალენდარული დღის განმავლობაში ყოველგვარი საფუძვლის მითითების გარეშე დააბრუნოს შეძენილი ნივთი. ეს ვადა აითვლება მომხმარებლის მიერ საქონლის მფლობელობაში მიღებიდან. ასეთ შემთხვევებში ვენდორი მზად უნდა იყოს პროდუქტის უკან მიღებასა და მყიდველისთვის თანხის დაბრუნებაზე. პროდუქციის შეცვლა/დაბრუნებაზე მეტი ინფორმაციის მიღებისთვის გადადით ბმულზე: "დაბრუნებისა და გადაცვლის წესები".
კატეგორიები
- პროდუქტი უნდა განთავსდეს შესაბამის კატეგორიაში. ზოგიერთი პროდუქტისთვის დასაშვებია ერთდროულად რამოდენიმე კატეგორიაში განთავსება.
- პროდუქტი უნდა განთავსდეს "საბოლოო" კატეგორიაში. მაგალითი: არ შეიძლება განვათავსოთ შიდა ფილტრი კატეგორიებში "მტკნარი წყალი", "აპარატურა", "ფილტრაცია"; პროდუქტისთვის არსებობს შესაბამისი "საბოლოო" კატეგორია - " შიდა ფილტრი".
- კატეგორია "ანონსი" განკუთვნილია სარეალიზაციოდ ახლო მომავალში მისაღები პროდუქციის წინასწარი გაყიდვებისთვის. კატეგორიაში "ანონსი" პროდუქციის განთავსება მხოლოდ "იურიდიული პირი / ი.მ." პაკეტის მფლობელებს შეუძლიათ. დაუშვებელია "ანონსი"-ს კატეგორიაში განთავსებული პროდუქტისთვის სხვა კატეგორიის მინიჭებაც.
- ანონსის განთავსების ერთ-ერთი პირობაა პროდუქტის მარაგის შევსების ვადის მითითება. ამ ვადის შეცვლა დასაშვებია პროდუქტზე პირველი შეკვეთის დაფიქსირებამდე. მყიდველი წინასწარ იხდის პროდუქტის თანხას. ვენდორი კი ვალდებულია პროდუქტი მარკეტის კურიერს დროულად ჩააბაროს. შემთხვევის დაფიქსირებისას, როდესაც ვენდორმა ვერ შეძლო დაანონსებული პროდუქციის მითითებულ ვადებში წარდგენა, მას დაეკისრება პირგასამტეხლო, რომელიც განისაზღვრება ყოველი შეკვეთილი პროდუქტის სრული ღირებულების 2%-ით. მსგავსი პრობლემის თავიდან ასაცილებლად, უმჯობესია პროდუქცია ზედმეტად ადრე არ დააანონსოთ: შესაძლოა სატრანსპორტო კომპანიამ დაგიგვიანოთ ტვირთი, ან ავიაკომპანიამ გადადოს თვითმფრინავის რეისი, რომლითაც თევზს აგზავნიან, თევზის ზოგიერთი სახეობა შეიძლება საერთოდ არ გამოგზავნონ და ა.შ. ამიტომ უმჯობესია, თუ აპარატურისა და ხელსაწყოების დაანონსებას დაიწყებთ ტვირთის საზღვარზე გადმოსვლის შემდეგ (სანამ საბაჟო და ქვეყნისშიდა ტრანსპორტირების საკითხებს მოაგვარებთ). თევზის გაყიდვის შემთხვევაში, უმჯობესია ჯერ მიიღოთ პარტია, შეაფასოთ თევზის მდგომარეობა, რაოდენობა და დააანონსოთ გაყიდვები საკარანტინე პროცედურების მიმდინარეობისას. ყველაზე ადრე დაანონსება შეუძლიათ თევზის ადგილობრივ მომშენებლებს - რამოდენიმე კვირით ადრე, ვიდრე თევზი საჭირო ზომას მიაღწევს.
პროდუქტის გვერდი
- პროდუქტის განთავსებისას სავალდებულოა შემდეგი ველების შევსება:
- სახელწოდება
- კატეგორია
- ფასი
- მარაგის რაოდენობა
- გადასახადები (მხოლოდ დღგ-ს გადამხდელთათვის)
- მიწოდების პარამეტრები / წონა
- მახასიათებლები / მდგომარეობა (ახალი/მეორადი)
- პროდუქტს უნდა ჰქონდეს მინიმუმ ერთი ფოტო. ახალი პროდუქციის ფოტო შეგიძლიათ მოიძიოთ მწარმოებლის საიტზე. მეორადი პროდუქციის გაყიდვის შემთხვევაში, აუცილებელია დაურთოთ პროდუქტის რეალური ფოტო.
- თევზების კატეგორიაში განთავსებულ პოზიციას აუცილებლად უნდა დაურთოთ მინიმუმ ერთი რეალური ფოტო ან ვიდეო - სწორედ იმ თევზების, რომელსაც ყიდით. ასევე შეგიძლიათ დაამატოთ ერთი ან რამოდენიმე ფოტო ინტერნეტიდან. პროდუქტი ვერ გაივლის მოდერაციას, თუ თან ახლავს თევზის მხოლოდ ინტერნეტიდან აღებული ფოტო/ვიდეო. აქ საუბარი არ მიდის ყოველი ცალკეული თევზისთვის ფოტოსესიის ჩატარებაზე. მაგრამ ვინაიდან საქმე ონლაინ-შეძენას ეხება, მყიდველს სწორი წარმოდგენა უნდა შეექმნას, თუ რა ხარისხის თევზს ყიდულობს.
